8
Nanging Hyang Yesus luas nuju Bukit Saitun.
2 Benjangane tatkala semeng ngremeng,
Hyang Yesus luas malih ka Genah Agung Mabaktine tur akeh anake ngrauhin Ida.
Raris Ida malinggih saha ngajahin anake akeh punika.
3 Irika raris rauh para guru agama Yahudine sareng para anak Parisine makta anak istri sane katara mamitra.
Ipun sami nunden anake istri punika ngadeg ring tengah-tengah anake sami.
4 Raris ipun sami mabaos kapining Hyang Yesus sapuniki,
“Guru,
tiang sami manggihin anak istri puniki sedek mamitra.
5 Yening manut ukum agamane,
anak istri sane malaksana sekadi puniki sapatutne katimpugin nganggen batua kantos padem.
Sane mangkin,
sapunapike manut Guru indik anake istri puniki?”
6 Ipun sami mataken sapunika buat nyebag Ida mangda mresidayang nuduh Ida.
Nanging Hyang Yesus mungkutang raga raris nulis nganggen jerijin Idane ring tanahe.
7 Ritatkala para pemimpin Yahudine punika sedsed mataken,
Hyang Yesus raris nyegjegang raga saha ngandika kapining ipun sami sapuniki,
“Sapa sirake saking jerone sami sane nenten taen madosa,
ipun sapatutne sane kapertama nimpugin anake istri puniki nganggen batu.”
8 Irika Hyang Yesus mawali mungkutang raga raris nulis malih ring tanah.
9 Ritatkala ipun sami mirengin pengandikan Hyang Yesuse sekadi punika,
raris seka besik ipun sami matilar saking genahe punika ngawit sane paling lingsir.
Pamuputne wantah Hyang Yesus sareng anake istri sane kari irika.
10 Hyang Yesus raris nyegjegang raga saha ngandika kapining anake istri punika sapuniki,
“Dijake anake sami punika?
Nenten wenten ke anak sane ngukum ragane?”
11 Irika raris anak istri punika matur sapuniki,
“Nenten wenten,
Ratu.”
Raris Hyang Yesus ngandika malih sapuniki,
“Tiang pada nenten ja ngukum ragane.
Rarisang ja budal tur sampunang ja malaksana dosa malih!”]
Hyang Yesus puniki Galang Jagat
12 Irika raris Hyang Yesus malih ngandika ring anake akeh sapuniki,
“Tiang niki galang jagat.
Sapa sira ja sane ngiring Tiang,
ipun nenten jagi mamargi ring kapetengan,
nanging ipun jagi madue galang sane ngicen urip.”
13 Raris para anak Parisine mabaos kapining Hyang Yesus sapuniki,
“Ragane ngamaosang indik dewek Ragane praragan.
Punika mawinan baos Ragane nenten ja sah.”
14 Hyang Yesus raris masaur sapuniki,
“Yadiastun Tiang ngamaosang indik dewek Tiange praragan,
baos Tiange punika sah.
Krana Tiang uning asal Tiange tur kija Tiang jagi luas.
Nanging jerone makasami nenten uning asal Tiange,
tur kija Tiang luas.
15 Jerone ngakimin Tiang nganggen caran manusa ngakimin anak lianan.
Tiang nenten ngakimin sapa sira ja.
16 Nanging yening Tiang ngakimin anak lianan,
pastika pengakiman Tiange adil.
Krana nenten ja Tiang praragan sane ngakimin,
nanging Tiang ngakimin kasarengin olih Sang Hyang Aji sane ngutus Tiang.
17 Ring ukum agama Yahudine sampun katulis yening wenten kakalih anak sane ngamaosang paindikan patut,
babaosane punika sah.
18 Wenten kakalih sane ngamaosang indik Tiang,
inggih punika Tiang miwah Sang Hyang Aji sane ngutus Tiang.”
19 Raris para anak Parisine mabaos sapuniki,
“Dijake Ajin Ragane punika?”
Hyang Yesus raris masaur sapuniki,
“Jerone nenten uning Tiang utawi Ajin Tiange.
Yening jerone uning Tiang,
jerone pada uning Ajin Tiange.”
20 Makasami paindikan punika kanikayang olih Hyang Yesus,
risedek Ida ngajahin nampek ring kropak genah maturan jinah,
ring Genah Agung Mabakti ring Sang Hyang Pengardi.
Nanging nenten wenten anak sane ngejuk Ida,
krana dereng galah Idane jagi nandang paindikane punika.
Hyang Yesus Nenten Mawit saking Jagate
21 Raris Hyang Yesus ngandika malih ring ipun sami sapuniki,
“Tiang jagi luas.
Raris jerone jagi ngrereh Tiang,
nanging ring genah Tiange luas jerone nenten mresidayang mrika krana jero pacang padem ulian dosan jerone.”
22 Raris para pemimpin Yahudine saling takenang sapuniki,
“Napike Ipun jagi ngamademang Raganyane,
santukan Ipun ngandika,
‘Ring genah Tiange luas,
jerone nenten mresidayang mrika’?”
23 Raris Hyang Yesus ngandika ring ipun sami sapuniki,
“Jerone rauh saking sor,
nanging Tiang rauh saking baduur.
Jerone saking jagate sane jaat,
nanging Tiang nenten ja saking jagate sane jaat puniki.
24 Punika mawinan Tiang ngandikayang indik jerone jagi padem ulian dosan-dosan jerone.
Sujatine jerone jagi padem sekadi punika yening jerone nenten pracaya kapining Tiang,
sane kasambat Tiang Wenten.b”
25 Raris para anak Parisine mataken sapuniki,
“Sujatine sirake Ragane?”
Hyang Yesus ngandika sapuniki,
“Sekadi sane sampun Tiang pidartayang kapining jerone saking pengawit.
26 Sujatine akeh pisan sane musti raosang lan akimin Tiang indik jerone.
Nanging ring gumine puniki Tiang wantah ngamaosang sekancan sane pirengin Tiang saking Sang Hyang Aji sane ngutus Tiang.
Ida sane patut kapracayain.”
27 Nanging ipun sami nenten ja ngerti pengandikan Hyang Yesuse punika indik Sang Hyang Aji.
28 Punika mawinan Hyang Yesus ngandika ring para anak Parisine sapuniki,
“Sasampune Tiang,
Sang Putraning Manusa,
kaunggahang olih jerone,
jerone jagi uning Tiang sane kasambat Tiang Wenten.
Turmaning jerone jagi uning makasami sane laksanayang Tiang nenten ja manut pikayunan Tiange praragan.
Tiang wantah ngandikayang napi sane kaajahin olih Sang Hyang Aji kapining Tiang.
29 Ida sane ngutus Tiang setata nyarengin Tiang.
Tur Ida nenten nilarin Tiang praragan,
krana Tiang setata nglaksanayang paindikan sane ngranayang Ida seneng.”
30 Sasampune Hyang Yesus ngandikayang paindikane makasami punika,
akeh wenten anake sane pracaya kapining Ida.
Paindikan sane Patut Jagi Mebasang Manusa saking Dosa
31 Raris Hyang Yesus ngandika ring anak Yahudine sane pracaya ring Ida sapuniki,
“Yening ragane satya nglaksanayang sekancan pengajahan Tiange puniki,
ragane yakti pengiring Tiange.
32 Ragane jagi uning paindikan sane patut saking Sang Hyang Pengardi,
tur paindikane sane patut punika ngranayang ragane jagi kabebasang.”
33 Raris wenten sane masaur sapuniki,
“Napi mawinan Ragane ngandikayang sekadi puniki,
‘Ragane sami jagi kabebasang?’
Tiang sami nenten taen dados parekan ring sapa sira ja.
Tiang puniki soroh sentanan dane Abraham!”
34 Raris Hyang Yesus ngandika sapuniki,
“Tiang ngandikayang sane patut,
sujatine sapa sira ja sane malaksana dosa,
ipun kaucap parekan dosa.
35 Umpamine,
anake sane mamarekan nenten ja madue genah langgeng ring kaluargan pamekelnyane.
Nanging okan pamekelnyane punika tetep madue genah ring kaluargannyane salamin-laminne.
36 Sane mangkin,
yening Sang Putra mebasang ragane sami,
yakti-yakti ragane kabebasang.
37 Tiang uning ragane soroh sentanan dane Abraham.
Nanging ragane meled ngamademang Tiang,
krana ragane nenten kayun nerima pengajahan Tiange.
38 Tiang ngandikayang napi sane cingakin Tiang saking Ajin Tiange.
Nanging ragane nglaksanayang napi sane ragane plajahin saking bapan ragane.”
39 Raris ipun sami masaur sapuniki,
“Ajin tiange dane Abraham.”
Irika raris Hyang Yesus nyaurin sapuniki,
“Sujatine,
ragane nenten ja soroh sentanan dane Abraham krana parilaksanan ragane nenten nulad parilaksanan dane Abraham.
40 Tiang ngajahin paindikan sane patut kapining ragane,
inggih punika pengajahan sane pirengin Tiang saking Sang Hyang Pengardi.
Yadiastun asapunika,
ragane meled ngamademang Tiang.
Dane Abraham nenten malaksana sekadi punika!
41 Punika muktiang ragane nglaksanayang pakaryan bapan ragane sane lianan.”
Raris ipun sami masaur sapuniki,
“Tiang makasami nenten ja pianak babinjat.
Ajin tiange wantah siki,
inggih punika Sang Hyang Pengardi.”
42 Raris Hyang Yesus ngandika sapuniki,
“Yening Sang Hyang Pengardi yakti Ajin ragane,
ragane jagi tresna asih kapining Tiang,
krana asal Tiange saking Sang Hyang Pengardi.
Tiang rauh nenten ja saking pikayunan Tiange praragan,
nanging Ida sane ngutus Tiang.
43 Ragane nenten kayun ngresepang pengajahan Tiange.
Punika mawinan ragane nenten ngerti pengandikan Tiange.
44 Ratun para setan mula bapan ragane tur ragane misadya ninutin ia.
Sujatine,
saking pengawitne ratun para setane ngamademang manusane.
Ia tusing taen malaksana ane patut krana tusing ada paundukan ane patut sid dewek iane.
Yening ia mogbog,
ento mula bikasne,
krana ia mula tukang dusta lan asal sekancan dustane.
45 Nanging krana Tiang ngandikayang paindikan sane patut,
punika mawinan ragane nenten pracaya kapining Tiang.
46 Wentenke anake iriki sane prasida muktiang yening Tiang madue dosa?
Yening Tiang ngandikayang paindikan sane patut saking Sang Hyang Pengardi,
ngudake ragane nenten pracaya kapining Tiang?
47 Anake sane maasal saking Sang Hyang Pengardi,
mirengin pengandikan Idane.
Nanging ragane sami nenten ja maasal saking Sang Hyang Pengardi.
Punika mawinan ragane nenten kayun mirengin pengandikan Idane.”
48 Raris para pemimpin Yahudine nganistayang Hyang Yesus sapuniki,
“Baos tiange sami patut:
Ragane anak Samariac sane karangsukin buta kala!”
49 Irika raris Hyang Yesus ngandika sapuniki,
“Tiang nenten ja karangsukin buta kala.
Tiang bakti kapining Ajin Tiange,
nanging jerone nganistayang Tiang.
50 Tiang nenten ja ngrereh kaagungan dewek Tiange praragan,
nanging wenten Asiki sane ngranayang Tiang kaagungang.
Tur Ida dados akim sane adil.
51 Tiang ngandikayang sane patut,
sujatine anake sane ninutin pengajahan Tiange,
nenten ja jagi padem salamin-laminne.”
52 Raris para pemimpin Yahudine punika mabaos ring Hyang Yesus sapuniki,
“Mangkin tiang sami uning Ragane yakti karangsukin buta kala.
Dane Abraham punika sampun padem,
kenten pada para sinoman.
Nanging Ragane ngandikayang,
‘Anake sane ninutin pengandikan Tiange,
nenten ja jagi padem salamin-laminne.’
53 Dane Abraham punika sampun padem,
kenten pada para sinoman sampun padem.
Ngudake Ragane ngrasa agengan kapining dane Abraham ajin iragane makasami?
Manut Ragane sirake Ragane puniki?”
54 Raris Hyang Yesus masaur sapuniki,
“Yening Tiang ngrereh kaagungan Tiange praragan,
kaagungan punika nenten ja wenten artine.
Nanging Ajin Tiange sane ngagungang Tiang.
Jerone ngaku-ngaku nyembah Sang Hyang Aji.
55 Sujatine jerone nenten uning Ida,
nanging Tiang uning Ida.
Yening Tiang ngandika wantah Tiang nenten uning Ida,
Tiang anak bogbog pateh sekadi jerone.
Nanging Tiang uning Ida,
tur Tiang ninutin pengandikan Idane.
56 Ajin jerone dane Abraham seneng pisan krana jagi nyingakin sapengrauh Tiange.
Dane sampun nyingak tur dane seneng.”
57 Raris para pemimpin Yahudine mabaos ring Hyang Yesus sapuniki,
“Ragane dereng mayusa seket (50) tiban!
Sajake Ragane sampun nyingakin dane Abraham?”
58 Raris Hyang Yesus masaur sapuniki,
“Tiang ngandikayang sane patut,
sujatine sadereng Abraham maurip,
Tiang sampun wenten.”
59 Raris anak Yahudine sami ngambil batu jagi nimpugind Hyang Yesus kantos padem.
Nanging Hyang Yesus ngengkebin raga,
raris matilar saking Genah Agung Mabakti kapining Sang Hyang Pengardi.